طبعا العنوان يمكن يظهر ما أريد قوله
انت بتخاف من مين أكتر؟؟؟
اللى بيفتح مواقع إباحية:
بتخاف من إن أبوك أو أمك أو أختك أو أخوك يشوفك وإنت بتتفرج عليه ... أكتر!!
ولا بتخاف من الله الرقيب؟؟
اللى بتكلم شباب على الشات من وراء أهلها:
بتخافى من إن والدك أو والدتك يعرفوا ... أكتر!!
ولا بتخافى من الله الرقيب؟؟
والبنت اللى ملبستش حجاب وتدخلى المسجد تلبسيه سواء للصلاة أو لحفظ القرآن أو لمناسبة بتحضريها:
بتخافى من الناس اللى فى المسجد ... أكتر!!
ولا بتخافى من الله الرقيب؟؟
اللى بيأخذ رشوة فى شغله:
بتخاف انك تتعمل لك قضية والرقابة الإدارية تعرف باللى بتعمله ... أكتر!!
ولا بتخاف من الله الرقيب؟؟
اللى بياكل من فلوس ربا:
بتخاف ان مستواك المادى ينقص أو يقل ... أكتر!!
ولا بتخاف من الله الرقيب؟؟
اللى بيكون مع الناس أحسن أخلاقا وبشاشة:
بتخاف إن الناس تعرف إنك بتضرب زوجتك وبتشتم أولادك ويمكن بتشتم والدتك ... أكتر!!!
ولا بتخاف من الله الرقيب؟؟
اللى بيغش فى الإمتحانات ومعتمد على تسريبها والوسايط عشان ينجح:
بتخاف إنك تسقط أو تعيد سنة دراسية والناس تقلل احترامها ليك ... أكتر!!
ولا بتخاف من الله الرقيب؟؟
والأمثلة لو مكثت الليل بطوله لن يكفى قولها
مين أولى انك تخاف منه؟؟؟
ربنا اللى استهنت بإنه ناظر إليك وشايفك دايما؟؟
بتخاف من ذى سلطة فى الأرض ومبتخفش من الملك؟؟
مفكرتش إن ده مدخل للشرك بالله لأنه الأوحد اللى يجب أن تخاف منه وخصوصا لو فى معصيته؟؟؟
مفكرتش إنك معرض للموت وإنت على موقع إباحى أو على ا
الشات أوبتتبرجى أو بتفتح الدرج عشان تأخذ رشوة أو بتأكل من مال حرام أو بتهين أمك أو بتضرب زوجتك أو إنت فى لجنة امتحان وبتغش؟؟؟؟
مفكرتش إنك لو مت كدة هتبعث على ده؟؟؟
هتقول لربنا الرقيب إيه؟؟
مفكرتش لما يسألك (( ليه جعلتنى ياعبد أهون الناظرين إليك)) هترد تقول إيه؟؟؟
ياريت
نصحى ونشوف إحنا بنعمل إيه وبنعصى مين!!
ياريت يعرف كل واحد مننا إنه هيموت ...
محدش أغلى عند ربنا من حبيبه ومصطفاه سيدنا محمد بن عبد الله عليه أفضل الصلوات والتسليم ...
وحتى النبى صلى الله عليه وسلم مات ...
ياريت تجهز نفسك لليوم اللى هتقف فيه بين يدي الملك
وياريت تعرف مقام الرقيب كويس وتضع هذه الآية دوما نصب عينيك:
{... إِنَّ اللّهَ كَانَ عَلَيْكُمْ رَقِيباً }النساء1
{...وَكَانَ اللَّهُ عَلَى كُلِّ شَيْءٍ رَّقِيباً }الأحزاب52
__________________
الخميس يونيو 03, 2010 2:43 am
